اسلام آباد(نیوز ڈیسک) پاکستان تحریک انصاف کے چیئرمین عمران خان کی زیر قیادت راولپنڈی کے مری روڈ پر ریلی کی قیادت سے قبل راستے میں عمران خان کے خلاف بینرز آویزاں کر دیئے گئے ہیں۔میڈیا رپورٹس کے مطابق سابق وزیراعظم عمران خان کے دور حکومت میں ہونے والی کرپشن کے الزامات کے حوالے سے یہ بینر گزشتہ شب لگائے گئے۔رنگ روڈ پر لگے بینرز پر ’کرپشن میں ملوث پی ٹی آئی بے نقاب‘ لکھا گیا ہے۔ایک اور بینر’ پاکستان کا قرض 80 فیصد بڑھا کر خود مختاری کی باتیں کرنے والا بہروپیہ ہے‘ تحریر ہے۔ایک بینر پر” کمیشن ایجنٹ فرح گوگی عوام کا پیسہ لے کر کہاں گئی عمران خان جواب دو” تحریر ہے۔
عمران خان کی راولپنڈی میں ریلی کے روٹ پر "نامعلوم” بینرز لگا دیئے گئے، عمران خان کو کرپٹ ثابت کرنے کی کوشش، بینرز کس نے لگائے کسی کا نام موجود نہیں۔۔!! #PradeGround #ImranKhan
— Mughees Ali (@mugheesali81) July 2, 2022
ایک اور بینر پر لکھا ہے کہ پانچ سال میں عمران خان کے اثاثوں میں ڈھائی سو فیصد اضافہ ہوا،میرا تحفہ میری مرضی سرٹیفائیڈ چور،’راولپنڈی اسلام آباد کے عوام عمران خان کو مسترد کرتے ہیں‘ تحریر ہے۔اس کے علاوہ بھی کئی بینرز لگائے گئے ہیں جس میں عمران خان اور سابق خاتون اول بشریٰ بی بی کی قریبی دوست فرح خان کے خلاف عائد الزامات تحریر ہیں۔خیال رہے کہ پاکستان تحریک انصاف کے چیئرمین عمران خان نے کہا ہے کہ انشااللہ آج 2جولائی پریڈ گراؤنڈ میں جلسہ تاریخی ہوگا، میں راولپنڈی سے پریڈ گراؤنڈ تک ریلی کی قیادت کروں گا۔سماجی رابطے کی ویب سائٹ ٹوئٹر پر جاری بیان میں سابق وزیراعظم نے کہا کہ یہ جلسہ سیاسی عدم استحکام، سخت گرم موسم میں لوڈشیڈنگ اور پیٹرول قیمتوں میں اضافے کیخلاف ہے۔ واضح رہے کہ پاکستان تحریک انصاف آج (ہفتہ کو ) پریڈ گراؤنڈ میں حکومت مخالف احتجاج کرنے جارہی ہے، پی ٹی آئی کی جانب سے احتجاج کا موضوع’ چوروں کو ریلیف، عوام کو تکلیف’ رکھا گیا ہے۔ دوسری جانب پاکستان تحریک انصاف کو دارالحکومت اسلام آباد کے پریڈ گراؤنڈ میں عوامی جلسے کا این او سی جاری کردیا گیا ہے۔اسلام آباد انتظامیہ نے این او سی میں کہا ہے کہ احتجاج کے دوران ریاست کے خلاف نعرے بازی نہیں ہوگی، پریڈ گراؤنڈ میں احتجاج مقررہ وقت میں ختم کرنا ہوگا اور دھرنے کی اجازت نہیں ہوگی۔