یقین ہے وزیراعظم عمران خان سیالکوٹ واقعے میں انصاف کے تقاضوں کو پورا کریںگے،سابق سری لنکن کپتان

کولمبو (نیوز ڈیسک) سری لنکن کرکٹ ٹیم کے سابق کپتان اور مایہ ناز بلے باز سنتھ جے سوریا بھی سیالکوٹ میں پیش آنے والے افسوسناک واقعے پر بول پڑے۔ جمعے کے روز سیالکوٹ میں پیش آنے والے افسوسناک واقعے پر جہاں پوری پاکستانی قوم افسردہ ہے وہیں دیار غیر میں رہنے والے بھی اس افسوسناک واقعے میں ملوث افراد کے خلاف سخت قانونی کارروائی کا مطالبہ کر رہے ہیں۔پنجاب پولیس کے مطابق سیالکوٹ کی فیکٹری میں پیش آنے والے واقعے کے 13 مرکزی ملزمان سمیت 120 ملزمان کو گرفتار کیا جا چکا ہے اور گرفتار ملزمان سے تفتیش کی جا رہی ہے۔ اس حوالے سے سری لنکن صدر اور وزیراعظم نے بھی اپنے ردعمل کا اظہار کیا تھا تاہم اب 52 سالہ سابق سری لنکن کپتان سنتھ جے سوریا نے بھی سوشل میڈیا پر ایک پوسٹ شیئر کی ہے۔

What happened in Pakistani was very shocking. My deepest sympathies to the family. However, I know that the Pakistani prime minister @ImranKhanPTI will ensure that Justice will prevail. #Sialkot

— Sanath Jayasuriya (@Sanath07) December 4, 2021

سنتھ جے سوریا نے سوشل میڈیا پر پوسٹ میں لکھا کہ ’جو کچھ پاکستان میں ہوا وہ بہت ہی حیران کن ہے اور میری دلی ہمدردی متاثرہ خاندان کے ساتھ ہے،لیکن مجھے یقین ہے کہ وزیراعظم عمران خان سیالکوٹ واقعے میں انصاف کے تقاضوں کو پورا کریں گے‘۔یاد رہے کہ اس سے قبل سری لنکن وزیراعظم مہندا راجہ پاکسے بھی وزیراعظم عمران خان پر اس اعتماد کا اظہار کر چکے ہیں کہ وہ سیالکوٹ فیکٹری واقعے کے ملزمان کو قانون کے کٹہرے میں لائیں گے۔