ماضی کی یادیں تازہ، امیتابھ بچن کی ریکھا کے ہمراہ تصویر وائرل

ممبئی: بالی ووڈ کے شہنشاہ امیتابھ بچن نے ماضی کی یادیں تازہ کرتے ہوئے اپنی سابقہ محبوبہ ریکھا کے ہمراہ لی گئی تصویر شیئر کردی۔

امیتابھ بچن اکثر اپنی بلاگ پوسٹ میں اپنی پیشہ ورانہ اور ذاتی زندگی کے دلچسپ واقعات شیئر کرتے ہیں جس کی وجہ سے مداح بھی اُن کے بلاگز کا بےصبری سے انتظار کرتے ہیں۔

اب ایک حالیہ بلاگ پوسٹ میں، امیتابھ بچن نے اپنے شاندار فلمی کیریئر کی ایک یاد تازہ کی، انہوں نے ماضی کی یادگار تصویر شیئر کی جس میں ریکھا، راج کپور، ونود کھنہ، رندھیر کپور، شمی کپور، میوزک ڈائریکٹر کلیان اور محمود سمیت 70 کی دہائی کے کئی نامور بالی ووڈ اداکار شامل تھے۔
تصویر میں ماضی کے یہ تمام لیجنڈری اسٹارز اسٹیج پر کھڑے تالیاں بجا رہے ہیں جبکہ امیتابھ بچن پُرجوش انداز میں مائیک میں کچھ بول رہے ہیں۔

امیتابھ بچن نے اپنی بلاگ پوسٹ میں مداحوں سے تصویر کی کہانی فراہم کرنے کا وعدہ کرتے ہوئے کہا کہ “اس تصویر کے پیچھے ایک بہت بڑی کہانی ہے، کسی دن اس کہانی کو لازمی بیان کروں گا”۔

واضح رہے کہ ریکھا ایک زمانے میں امیتابھ بچن سے بے پناہ محبت کرتی تھیں، دونوں ستارے آخری مرتبہ 1981 میں یش چوپڑا کی فلم “سلسلہ” میں ایک ساتھ جلوہ ہوئے تھے۔جیا بچن کے ساتھ شادی کے باوجود بھی امیتابھ بچن کے ریکھا کے ساتھ عشق کے چرچے زباں زدعام تھے حالانکہ ان تینوں نے فلم ’سلسلے‘ میں ایک ساتھ بھی کام کیا جو بعد میں بلاگ بسٹر فلم ثابت ہوئی، دوسری جانب سالوں گزرنے کے باوجود ریکھا اور امیتابھ کا اسکینڈل آج بھی خبروں کی زینت بنتا رہتا ہے۔