پرویز الٰہی نے عمران خان کی مدد کیلئے پنجاب پولیس روانہ کردی

لاہور(مانیٹرنگ ڈیسک، آن لائن)وزیر اعلیٰ پنجاب پرویز الٰہی نے عمران خان کی مدد کیلئے پنجاب پولیس روانہ کردی، نجی ٹی وی نیو ٹی وی کے مطابق بنی گالہ میں چیئرمین پی ٹی آئی عمران خان کی سکیورٹی کیلئے وزیر اعلیٰ پنجاب پرویز الٰہی نے پنجاب پولیس بھیج دی ہے۔

اہلکاروں نے وہاں پہنچ کر علاقے کی سکیورٹی بھی سنبھال لی ہے، دوسری جانب وزیر اعلیٰ پنجاب پرویز الٰہی نے کہاہے کہ عمران خان، تحریک انصاف اور ہم افواج پاکستان کے ساتھ ہیں کسی کو بھی فوج کا نام بدنام کرکے سیاسی مقاصد حاصل کرنے نہیں دیں گے۔ شہباز گل کے بیان سے فائدہ نہیں نقصان ہوا ہے اور پی ٹی آئی قیادت کو ان کے بیان سے الگ ہونا چاہیے۔ ایک نجی ٹی وی کو انٹرویو میں وزیر اعلیٰ پنجاب نے کہا کہ افواج پاکستان سرحدوں کی حفاظت کی ضامن ہے اور ہمارا فخر ہے،فوج کے خلاف پراپیگنڈا ملک دشمن ہی کر سکتا ہے،جو کوئی بھی فوج کے خلاف بات کرتا ہے اس کو ڈکلیئر کیا جائے کہ وہ پاکستان اور دین اسلام کا دشمن ہے،کسی بھی صورت افواج پاکستان کے خلاف بات نہیں کر سکتے۔وزیر اعلیٰ پنجاب نے کہا ہے کہ ن لیگ والے غلط اور بے بنیاد پراپیگنڈا کر رہے ہیں،ن لیگ کے میڈیا سیل سے جھوٹا پراپیگنڈا کیا جا رہا ہے۔ پرویز الٰہی نے کہا کہ شہباز گل کے بیان سے فائدہ نہیں نقصان ہوا ہے اور پی ٹی آئی قیادت کو ان کے بیان سے الگ ہونا چاہیے۔