’’جاو میاں اپنا کام کرو ہمیں کام نہ سکھاؤ‘‘ڈی آئی جی کو جواب دینے پر5 اہلکار معطل

کراچی(نیوز ڈیسک)سڑک کنارے خوش گپیوں میں مصروف پولیس اہلکاروں کا بھیس بدل کر شہرکے دورے پر نکلے ڈی آئی جی کو جواب، ڈی آئی جی نے 5اہلکاروں کو معطل کر دیا۔ تفصیلات کے مطابق کراچی میں شاہراہ فیصل پر ڈیوٹی چھوڑ کر ایک جگہ بیٹھ کر گپ شپ کرنے والے 5 پولیس اہلکاروں کو ڈی آئی جی ٹریفک احمد یار چوہان نے معطل کر دیا ہے۔عام شہری کے بھیس میں دورے کے دوران ڈی آئی جی ٹریفک احمدیار چوہان کو پولیس اہلکاروں نے ترکی بہ ترکی جواب دیئے۔ڈی آئی جی ٹریفک احمد یار چوہان پرائیویٹ کار میں شہر میں گھوم پھر رہے تھے کہ شارع فیصل پر ایئرپورٹ کے اسٹار گیٹ سگنل پر ڈیوٹی چھوڑ کر ایک جگہ جمع پولیس اہلکاروں کے پاس جا پہنچے۔

ڈی آئی جی ٹریفک سڑک کنارے کھڑے ہوکر ان کی گفتگو سننے لگے، اہلکار ٹریفک کنٹرول کرنے کے بجائے خوش گپیوں میں مصروف تھے۔ڈی آئی جی نے اہلکاروں سے شہری بن کر کہا کہ ’’ٹریفک کو کنٹرول کرو یہاں کیوں کھڑے ہو‘‘، اہلکاروں کی جانب سے طنزیہ جواب کی ڈی آئی جی ٹریفک کو قطعی طور پر توقع نہیں تھی۔ایک اہلکار نے کہا کہ ’’جاو میاں اپنا کام کرو ہمیں کام نہ سکھاؤ‘‘ جس پر ڈی آئی جی ٹریفک احمدیار چوہان نے ٹریفک پولیس کے 2 افسران سمیت 5 اہلکاروں کو معطل کرکے لائن حاضر کر دیا ۔واضح رہے کہ بھیس بدل کر شہر کا دورہ کرنے کے حوالے سے وزیر اعلیٰ خیبرپختونخوا کی بھی متعدد ویڈیوز وائرل ہو چکی ہیں، جن میں وزیراعلیٰ خیبرپختونخوا کو سرکاری ملازمین کو کرپشن کرتے رنگے ہاتھوں پکڑتے دیکھا جا سکتا ہے۔